भारतका दुईजना केन्द्रीय मन्त्रीद्वारा राजीनामा
नयाँ दिल्ली, २०७९ असार २२ गते बुधबार । भारतको केन्द्रीय सरकारका दुईजना मन्त्रीले बुधबार पदबाट राजीनामा दिनुभएको छ । प्रधानमन्त्री नरेन्द्र मोदी नेतृत्वको मन्त्रीपरिषद्का सदस्यद्वय मुख्तर अब्बास नाक्भी र आरसीपी सिंहले राजीनामा दिनुभएको हो ।
उहाँहरू दुवै जना राज्य सभा सदस्य हुनुहुन्थ्यो । उहाँहरुको राज्य सभा सदस्यको कार्यकाल बिहीबारदेखि सकिने भएकाले उहाँहरुले एक दिन अगाडि नै मन्त्री पदबाट राजीनामा दिनु भएको हो ।
मन्त्री भएकै बेला संसद सदस्यको म्याद सकिएर मन्त्री पद छोड्नु परेको यो पहिलो पटक हो । उहाँहरु फेरि निर्वाचित हुनु अगाडि छ महिनासम्म मन्त्री हुन पाउने व्यवस्था छ । उहाँहरूलाई फेरि मन्त्रीको रूपमा सपथ खुवाइने सम्भावना पनि रहेको छ ।
हालै भएको राज्य सभा निर्वाचनबाट धेरै नेता निर्वाचित भएर आएका छन् । भारतको उत्तर प्रदेश, महाराष्ट्र, मध्य प्रदेश र राजस्थानमा राज्य सभा निर्वाचन हालै भएको हो । अहिले भएको निर्वाचनमा नाक्भीलाई भने पार्टीले उम्मेदवार बनाएको थिएन ।
जेडीयू गठबन्धनको तर्फबाट विहारबाट निर्वाचित भएका आरसीपी सिंहले सन् २०२१ को जुलाई ७ मा सपथ लिनुभएको थियो । रासस/एएनआई
