पत्रकार खसोग्जी पक्राउ र हत्या गर्ने योजनालाई साउदी युवराजको स्वीकृति

अमेरिकाले दर्जनौँ साउदीहरूमाथि प्रतिबन्ध लगाएको छ तर युवराजलाई भने लगाएको छैन। साउदी अरेबियाले उक्त रिपोर्टलाई अस्वीकार गर्दै त्यसलाई “नकारात्मक, झुटो र अस्वीकार्य” बताएको छ।

साउदीमा प्रमुख नेतृत्वदायी भूमिकामा रहनु भएका युवराज मोहम्मदले खसोग्जी हत्यामा उहाँको कुनै पनि भूमिका रहेको भन्ने अस्वीकार गर्नुभएको छ । खसोग्जी इस्तानबुलमा रहेको साउदी कन्सुलेट कार्यालयको भ्रमण गर्दा टर्कीमा मारिनु भएको थियो र उहाँको शरीर टुक्रा टुक्रा पारिएको थियो।

५९ वर्षीय पत्रकार खसोग्जी कुनैबेला साउदी सरकारका सल्लाहकार हुनुहुन्थ्यो र राज परिवारसँग उहाँको निकटता थियो । तर पछि उहाँ टाढिनु भयो र स्व-निर्वासनमा सन् २०१७ मा अमेरिका पुग्नु भएको थियो । त्यहीँ उहाँले वाशिङ्टन पोष्टका लागि मासिक स्तम्भ लेख्ने गर्नुहुन्थ्यो जसमा उहाँले युवराज मोहम्मदको नीतिहरूको आलोचना गर्नुहुन्थ्यो । बिबिसी