अदालतको फैसला अनपेक्षित, प्रधानमन्त्री ओलीले राजीनामा नदिने

काठमाडौं, २०७७ फागुन ११ गते मंगलबार

परराष्ट्रमन्त्री एवम् नेकपा ओली समूहका प्रवक्ता प्रदीपकुमार ज्ञवालीले सर्वोच्च अदालतको फैसला अनपेक्षित भए पनि फैसला मानेर जाने बताउनु भएको छ । जुन समस्या देखाएर संसद विघटन गरिएको थियो, त्यो समस्या भने अब कायमै रहने चिन्ता ज्ञवालीले व्यक्त गर्नुभयो ।

यसैबीच प्रधानमन्त्री केपी शर्मा ओलीले सर्वाेच्च अदालतको फैसलालाई स्वीकार गर्दै कार्यान्वयन गर्ने तर राजीनामा नदिने हुनुभएको छ । प्रतिनिधिसभा बिघटनको निर्णय बदर गर्दै आगामी फागुन २४ गतेभित्र संसद बैठक बोलाउन सर्वाेच्च अदालतको संबैधानिक इजलाशले फैसला गरेपछि पार्टीका नेतार मन्त्रीहरुसँगको छलफलपछि प्रधानमन्त्री ओली यस निर्णयमा पुग्नुभएको हो ।

अदालतको फैसलालगत्तै नेकपाका अध्यक्षसमेत रहनुभएका प्रधानमन्त्री ओलीले पार्टीका नेताहरुसँग बालुवाटारमा छलफल गर्नुभएको थियो । भर्खरै सकिएको छलफलमा प्रधानमन्त्री ओलीले अदालतको निर्णय कायान्वयन गरेर जाने र बुधवार आफ्नो धारणा सार्वजनिक गर्ने भन्दै यस्तो बताउनु भएको हो । छलफलपछि प्रधानमन्त्रीका प्रेस सल्लाहकार तथा नेकपाका नेता सूर्य थापाले सर्वोच्च अदालतले गरेको फैसला विवादास्पद रहेको भए पनि कायान्वयन गर्ने जानकारी दिनुभयो ।

‘सर्वोच्च अदालतले गरेको फैसला विवादास्पद छ, तर मान्नुपर्छ र कार्यान्वयन गर्नुपर्छ । यसका दुष्प्रभावहरू भविष्यमा देखिदैं जाने निश्चित छ । यसबाट राजनीतिक समस्याहरूको कुनै हल हुने अवस्था पनि छैन । बरू अस्थिरता अझै बढ्ने छ । सत्ताको खेल बढ्नेछ । प्रधानमन्त्रीले प्रतिनिधिसभाको सामना गरेर नै फैसला कार्यान्वयन गर्नुहुन्छ । तत्काल राजीनामा दिनुहुने छैन,’ प्रधानमन्त्री ओलीको तर्फबाट आधिकारिक धारणा राख्दै प्रेस सल्लाहकार थापाले भन्नुभयो ।