नेपाल बन्दको विरोधमा माइतीघरमा सचेत नागरिकको प्रदर्शन

काठमाडौं, २०७७ माघ २२ गते बिहीबार

स्वतन्त्र सचेत नागरिकको व्यानर लिएर बन्द विरोधी नागरिकहरु माइतीघर मण्डलामा आएर प्रदर्शन गरेका छन् । ‘नेपाल बन्द छैन, नेपाल खुला छ’ लेखिएको व्यानरसहित प्रदर्शन गरिरहेका छन् ।

‘जनतालाई दुःख दिने नेता हाम्रो कसरी ? नेता तिम्रो पाराले दुःख पाए साराले, बन्द केका लागि ?? नेपाल खुला छ’ लगायतका नारा लेखिएका प्लेकार्ड लिएर सचेत नागरिकको टोली माइतीघर मण्डलामा प्रदर्शन थालेको छ । बन्द, हडतालले देश र नागरिकको कहीं कतै हित नगर्ने भन्दै ती नागरिकहरुले बन्दलाई सदाका लागि बन्द गर्न बन्दकर्तालाई आग्रह गरेका छन् ।

उता प्रचण्ड-माधव पक्षका नेता कार्यकर्ताहरुले मुख्य चोकमा भेला भएर बजार, यातायात बन्द गराउँदै हिडेका छन् । अध्यक्ष पुष्पकमल दाहाल ‘प्रचण्ड’ र माधवकुमार नेपालसमेत बन्द गराउन सडकमा ओर्लनुभएपछि बन्दकर्ताहरु हौसिएका छन् । सुरक्षाकर्मीले नागरिकलाई सास्तीलाई ध्यान दिंदै अप्रिय घटना नहोस् भन्नेमा सचेत्ता अपनाइरहेका छन् । गोरखापत्र