दक्षिण अस्ट्रेलियामा भीषण आँधीको वितण्डा, हजारौँ घरमा विद्युत् सेवा अवरुद्ध

• आँधी र असिनाले जनजीवन प्रभावित ।
• सहायता माग्दै १०० भन्दा बढी फोन ।
• एक हजार ८७२ विद्युत् उपभोक्ता अझै प्रभावित ।

एडिलेड, अस्ट्रेलिया । अस्ट्रेलियाको दक्षिण अस्ट्रेलिया राज्यमा आइतबार आएको भीषण आँधीका कारण हजारौँ घरमा विद्युत् सेवा अवरुद्ध भएको छ । तीव्र हावा, ठूलो असिना र ढलेका रुखका कारण विभिन्न क्षेत्रमा क्षति पुगेको छ । आँधीपछि १०० भन्दा बढी व्यक्तिले आपत्कालीन सहायता मागेका छन् ।

राज्यका विभिन्न भागमा आइतबार दिउँसो सुरु भएको आँधी राजधानी एडिलेडसम्म पुगेको थियो । आँधीले सडक अवरुद्ध हुनुका साथै सवारीसाधन र घरनजिक रुख ढल्दा क्षति पुगेको स्थानीय सञ्चारमाध्यमले जनाएका छन् ।

अस्ट्रेलियन ब्रोडकास्टिङ कर्पोरेसन (एबीसी) का अनुसार राज्य आपत्कालीन सेवा (एसईएस) मा आइतबार दिउँसोदेखि १०० भन्दा बढी सहायता मागसम्बन्धी फोन आएका थिए । तीमध्ये करिब ८० प्रतिशत घटना रुख ढलेसँग सम्बन्धित थिए । एडिलेडको ह्याप्पी भ्याली क्षेत्रमा करिब तीन सेन्टिमिटर आकारका असिना परेको थियो ।

मौसमसम्बन्धी चेतावनीमा वुमेरा विमानस्थलमा प्रतिघण्टा ९८ किलोमिटरको हावाको गति मापन गरिएको उल्लेख छ । पोर्ट विलुङ्गा र माउन्ट कम्पासजस्ता तटीय क्षेत्रमा गल्फ बलको आकारका असिना परेको स्थानीय सञ्चारमाध्यमले जनाएका छन् ।

एसए पावर नेटवर्क्सका अनुसार आँधीका कारण आइतबार राज्यभर सात हजारभन्दा बढी विद्युत् उपभोक्ता प्रभावित भएका थिए । सोमबार दिउँसोसम्म पनि राज्यका विभिन्न क्षेत्रमा १५ वटा विद्युत् अवरोध कायम रहँदा एक हजार ८७२ ग्राहक विद्युत् सेवाबाट वञ्चित थिए ।

तीमध्ये एडिलेडको दक्षिणपूर्वी क्षेत्रमा सबैभन्दा ठूलो अवरोध देखिएको थियो । उक्त अवरोधका कारण ९६६ ग्राहक प्रभावित भएका थिए । प्रभावित क्षेत्रमा सोमबार रातिसम्म विद्युत् सेवा पुनः सञ्चालनमा ल्याउने लक्ष्य राखिएको थियो ।

मौसम विभागले सोमबार पनि दक्षिण अस्ट्रेलियाका केही क्षेत्रमा वर्षा, चट्याङ र आँधीको गतिविधि जारी रहन सक्ने जनाएको छ । सिन्ह्वा