एमसीसी परिमार्जनसहित संसदबाट अनुमोदन गर्ने नेकपाको निर्णय
![](https://voiceofkathmandu.com/wp-content/uploads/2020/09/cpn_standing_commit.jpg)
काठमाडौं, २०७७ भदौं २६ गते शुक्रबार
सत्तारुढ नेकपाको स्थायी कमिटीको बैठकले विकास र सहयोगसम्बन्धी अमेरिकी मिलेनियम च्यालेन्ज कर्पोरेसन (एमसीसी) सम्झौता परिमार्जनसहित संघीय संसद प्रतिनिधिसभाबाट पारित गर्ने निर्णय गरेको छ ।
नेपाल सरकार र एमसीसीबीच सन् २०१७ सेप्टेम्बर १४ मा सम्झौता भएको थियो । एमसीसीको ५० करोड अमेरिकी डलर र नेपाल सरकारको १३ करोड अमेरिकी डलरमा अन्तरदेशीय विद्युत् प्रसारण लाइन र सडक मर्मत परियोजना संचालन गर्नका लागि एमसीसी सम्झौता भएको हो ।
सत्तारुढ नेकपामा सम्झौताका कतिपय बुँदालाई लिएर विवाद हुँदा लामो समयदेखि एमसीसी अनुमोदनको पर्खाइमा संसदमा विचाराधीन रहेको थियो ।
एमसीसी सम्झौता २०७६ असार ३० गते प्रतिनिधिसभामा दर्ता भएको थियो । सम्झौतालाई प्रतिनिधिसभाबाट अनुमोदन गर्न नेपाल सरकार र एमसीसीबीच भएको सहमति अनुसार नै संसदमा दर्ता गरिएको थियो ।
लामो समयदेखि विवादित सम्झौता नेकपाले परिमार्जनसहित अनुमोदन गर्ने निर्णय लिएसँगै कार्यान्वयनमा जाने भएको छ । उक्त सम्झौता संसदको आगामी अधिवेशनबाट पारित हुने भएको हो ।
सम्झौतामा के के विषय संशोधन गर्ने भन्ने विषयमा खनाल नेतृत्वको कार्यदलले सुझाव दिएको छ । उक्त सुझावअनुसार नै एमसीसीमा परिमार्जन गरेर अनुमोदन गर्ने निर्णय लिइएको श्रेष्ठले जानकारी दिएका हुन् । कान्तिपुर अनलाईनबाट