इरानमाथि इजरायलको आक्रमणपछि रूसको चेतावनी   

मस्को, २०८१ कात्तिक १० गते शनिबार । इजरायलले इरानमा सैन्य लक्ष्यमा बमबारी गरेपछि इरान र इजरायलबीचको शत्रुतामा ‘खतरनाक वृद्धि’ भएको र यसले स्थिति नियन्त्रण बाहिर जाने खतरा बढेको शनिबार रूसले बताएको छ ।

जवाफी आक्रमणको बदलामा पुनः तनाव बढाउनेतर्फ कदम अघि बढाएमा तेहरानले ‘ठूलो मूल्य चुकाउनु पर्ने’ इजरायलले चेतावनी दिएको छ । संयुक्त राज्य अमेरिका र बेलायत दुवैले इरानलाई द्वन्द्वलाई थप नबढाउन माग गरेका छन्।

रूसी विदेश मन्त्रालयका प्रवक्ता मारिया जाखारोभाले यस क्षेत्रमा जारी विष्फोटक पदार्थको वृद्धिप्रति आफू चिन्तित रहेको बताउनुभएको छ ।

“हामी सबै पक्षलाई संयमित हुन, हिंसा रोक्न र घटनाहरूलाई विनाशकारी परिदृश्यमा परिणत हुनबाट रोक्न आग्रह गर्दछौं,” उहाँले जारी गरेको विज्ञप्तिमा भनिएको छ।

एएफपीका अनुसार उहाँले भन्नुभएको छ, “इरानलाई प्रतिशोधी कदम चाल्न उक्साउने काम बन्द गर्न र अनियन्त्रित तनावको चक्रव्यूहबाट बाहिर निस्कन आवश्यक छ ।”

रूसी राष्ट्रपति भ्लादिमिर पुटिनले यसै साता उदीयमान राष्ट्रहरूको ब्रिक्स समूहको शिखर सम्मेलनमा दुई क्षेत्रीय शक्तिराष्ट्रबीचको तनावले मध्यपूर्वमा पूर्ण युद्ध निम्त्याउने खतरा रहेको बताउनुभएको थियो ।

“इजरायल र इरानबीच द्वन्द्वको स्तर ह्वात्तै बढेको छ। यो सबै श्रृंखलाबद्ध प्रतिक्रियाको सम्झना दिलाउँछ र यसले सम्पूर्ण मध्यपूर्वलाई पूर्ण युद्धको सङ्घारमा पुर्याउँछ,” रूसी राष्ट्रपति पुटिनले आफ्नो सम्बोधनमा भन्नुभएको थियो ।

मस्कोको इरानसँग घनिष्ठ सम्बन्ध छ र यस क्षेत्रमासुरक्षा र आर्थिक हित र व्यापक द्वन्द्वको बारेमा रूसले व्यापक चिन्ता व्यक्त गरेको छ।