जासुसी गरेको अभियोगमा चिनियाँ इन्जिनियरलाई अमेरिकामा जेल सजाय   

वासिङ्टन, २०७९ माघ १२ गते बिहीबार । पैचिङ(Beijing) लाई सम्भावित भर्ती लक्ष्यबारे जानकारी उपलब्ध गराएको आरोपमा एक चिनियाँ इन्जिनियरलाई बुधबार अमेरिकी जेलमा आठ वर्षको सजाय सुनाइएको छ ।

सन् २०१३ मा विद्यार्थी भिसामा अमेरिका आएका र पछि सेनामा भर्ती भएका ची चाओचुनमाथि च्याङ्सु प्रान्तको सुरक्षा निकायलाई अमेरिकामा रहेका आठ जना व्यक्तिलाई काम दिन सकिने सूचना पठाएको आरोपमा छानविनपछि सजाय सुनाइएको हो । चीलाई अमेरिकी वैज्ञानिक र इञ्जिनियरको पहिचान गरेको आरोप लागेको थियो ।

यो निकाय एक प्रमुख चिनियाँ गुप्तचर एकाइ भएको र अवैध रूपमा अमेरिकी औद्योगिक र व्यापारिक रहस्यहरू प्राप्त गर्न र योजनाहरू प्राप्त गर्न चीनले प्रयोग गरेको आरोप अमेरिकी अधिकारीले लगाएका छन् ।

सन् २०१८ को सेप्टेम्बरमा चीलाई पक्राउ गरिएको थियो जसमा उहाँले चिनियाँ गुप्तचर निकायलाई आठ जनाको जीवनीसम्बन्धी जानकारी उपलब्ध गराउनुभएको थियो । ती सबै मूलतः चीन वा ताइवानका अङ्गीकृत अमेरिकी नागरिक थिए ।

करिब ३१ वर्षीय चीलाई सिकागोमा दुई सातालामो सुनुवाइपछि गैरकानुनी रूपमा विदेशी सरकारको एजेन्टको रूपमा काम गरेको र झूटो बयान दिएको अभियोगमा सेप्टेम्बरमा दोषी ठहर गरिएको थियो ।

अमेरिकी अभियोजनकर्ताहरूले जासुसीसम्बन्धी मामिलाहरूमा अक्सर यो आरोप प्रयोग गर्छन् जहाँ अभियुक्त स्पष्ट रूपमा विदेशी गुप्तचर एजेन्ट होइन ।

न्याय विभागका अनुसार चीले च्याङ्सु एकाइका डेपुटी डिभिजन डाइरेक्टर च्यू यान्चुनको निर्देशनमा काम गरेको आरोप लगाइएको छ ।

विश्वको अग्रणी विमान इन्जिन निर्माता मध्येको एक ओहायोस्थित जीई एभिएसन र अमेरिकी सैन्य आपूर्तिकर्तालगायत अन्य उड्डयन कम्पनीहरूबाट व्यापारिक गोप्य कुराहरू चोर्ने चिनियाँ प्रयाससँग चीको मुद्दा जोडिएको दावी गरिएको छ ।

त्यो प्रयासमा चु एक प्रमुख व्यक्ति हुनुहुन्थ्यो । सन् २०१८ मा बेल्जियममा पक्राउ परेका उहाँलाई पुर्पक्षका लागि अमेरिका सुपुर्दगी गरिएको थियो ।

उहाँलाई सन् २०२१ को नोभेम्बरमा आर्थिक जासुसी गरेको र व्यापारिक गोपनीयता चोरीको प्रयास गरेको अभियोगमा दोषी ठहर गरिएको थियो ।

नोभेम्बर २०२२ मा जूलाई २० वर्षको जेल सजाय सुनाइएको थियो । रासस,एएफपी