काठमाण्डूमा “छिङहाई-सिचाङ रेलमार्ग” विशेष वृत्तचित्र प्रदर्शन

रमेश हुतवाली/विराटनगर । रे टेलिभिजन एचडी काठमाण्डूले छिङहाई-सिचाङ रेलमार्ग सम्बन्धि विशेष वृत्तचित्र प्रदर्शन गरेको छ । काठमाण्डू धापासीस्थित गोधुली फुडल्याण्डमा आज साँझ एक भव्य समारोहबीच सो वृत्तचित्र प्रदर्शन गरिएको हो । चीनको सिचाङ (तिब्बत) मा अत्याधुनिक रेल सेवा सञ्चालन भएको २० औं वार्षिकोत्सवका अवसरमा उक्त वृत्तचित्र प्रदर्शन गरिएको रे टेलिभिजनका अध्यक्ष प्रकाश बाबु पौडेलले जानकारी दिनुभयो ।

वृत्तचित्र प्रदर्शन समारोहलाई सम्बोधन गर्नुहुँदै अध्यक्ष पौडेलले सो रेलमार्ग निर्माण गर्दा चीनले सिचाङको पर्यावरण, वन्यजन्तु र संस्कृतिको संरक्षणमा विशेष ध्यान दिएको बताउनुभयो । वृत्तचित्रका माध्यमबाट सिचाङको विगत र वर्तमान अवस्थाबारे थुप्रै अनुभवहरु हासिल गर्न सकिने धारणा व्यक्त गर्नुभयो ।

छिङहाई–सिचाङ रेलमार्ग सम्बन्धि विशेष वृत्तचित्रबारे बताउनुहुँदै चीनका लागि पूर्व नेपाली राजदूत विष्णु पुकार श्रेष्ठले विज्ञानको सहायता लिएर प्रकृतिलाई परिवर्तन गर्न सकिन्छ भन्ने कुरा चिनियाँ जनताले प्रमाणित गरेको बताउनु भयो । पूर्व राजदूत श्रेष्ठले ३०÷४० वर्ष अघिको चीन र अहिलेको चीनमा थुप्रै भिन्नता पाईने भन्दै चीनबाट सिक्ने धेरै कुराहरु रहेको जानकारी दिनुभयो । पछिल्ला वर्षहरुमा चीनले विज्ञान प्रविधि, अर्थतन्त्र र नवप्रवर्तन लगायतका धेरैमा महत्वपूर्ण विकास गरेको पनि बताउनु भयो । छिङहाई–सिचाङ रेलमार्ग सम्बन्धि वृत्तचित्रले चीनले गरेका अनौठा विकास निर्माणबारे जानकारी लिन सकिने भन्दै पूर्वराजदूत श्रेष्ठले वृत्तचित्र निर्माण र प्रदर्शनका लागि सीजिटिएन नेपाली सेवा र रे टेलिभिजलाई धन्यवाद ज्ञापन गर्नुभयो ।

सीआरआई नेपाली विभागका पूर्व भाषा विशेषज्ञ कृष्ण केसीले छिङहाई–सिचाङ रेलमार्ग निर्माणका क्रममा पश्चिमी विशेषज्ञहरुले सो परियोजना पुरा हुन नसक्ने भनिरहेको समयमा पनि चीनले कडा मेहनत र दूरदर्शी दृष्टिले संसारलाई आश्चर्यमा पार्ने हिसावबाट परियोजना पुरा गरेको जानकारी दिनुभयो ।

समारोहलाई सम्बोधन गर्नुहुँदै चाईना मिडिया ग्रुप काठमाण्डू ब्यूरोका प्रमुख चाङ युए वर्षाले छिङहाई–सिचाङ रेलमार्ग निर्माणताका आफु र आफ्ना साथीहरुले रेलमार्गबारे थुप्रै समाचार र रिपोर्टहरु बनाएको जानकारी दिनुभयो । चीनको विकास चिनियाँ जनताको मात्र नभएर सारा विश्वको विकास भएको बताउनुहुँदै उहाँले पछिल्ला वर्षहरुमा नेपालले पनि विकास निर्माणको क्षेत्रमा ठूलो प्रगति हासिल गरेको धारणा व्यक्त गर्नुभयो । छिङहाई–सिचाङ रेलमार्ग सम्बन्धि वृत्तचित्र हेरेर नेपाली जनताले पनि विकास गर्ने चिनियाँ तरिकाबारे बुझ्नु आवश्यक हुने उहाँको भनाई छ ।

न्यूज एजेन्सी नेपाल (नान) का अध्यक्ष सविन धमलाले छिङहाई–सिचाङ रेलमार्गको निर्माण आफैमा अनौठो र विश्लाई चकित पार्ने विकास भएको बताउनु भयो । रेलमार्ग निर्माणको समयमा तिब्बतको पर्यावरण र संस्कृतिको संरक्षण प्रमुख चुनौतीको रुपमा देखिएको भए पनि चीन सरकारले त्यसलाई वुद्धिमतापूर्वक समाधान गरेको जानकारी दिनुभयो ।

रे टेलिभिजनका स्टेशन म्यानेजर तथा कार्यक्रम सञ्चालक रोशन केसीले छिङहाई–सिचाङ रेलमार्ग सम्बन्धि विशेष वृत्तचित्र हेरेपछि सहभागीहरुले सो वृत्तचित्रका माध्यमबाट चीनको पछिल्लो चरणको विकास निर्माण र तिब्बतमा रेल सेवा सञ्चालन भएपछि स्थानीय जनतामा परेको सकारात्मक प्रभाव बारे जानकारी लिन पाएकोमा खुशी व्यक्त गरेका छन् । स्टेशन म्यानेजर केसीले आगामी दिनहरुमा पनि चाईना मिडिया ग्रुपसँग मिलेर दुई देशबीचको सम्बन्धलाई जनस्तरसम्म अभिवृद्धि गर्ने विभिन्न वृत्तचित्र तथा अन्य कार्यक्रमहरु निर्माण गर्ने योजना रहेको पनि बताउनु भयो ।

वृत्तचित्र प्रदर्शन समारोहमा कुटनीतिज्ञ, मैत्री संस्थाका प्रतिनिधिहरु, समाजसेवी, राजनीतिकर्मी, व्यवसायी, विद्यार्थी, शिक्षक र सञ्चारकर्मी लगायतको सहभागिता रहेको थियो ।